Sifat missiyasi: ÇELIKER GROUP asoschisi Emrah Çeliker bilan suhbat
Muvaffaqiyatli qurilish loyihalari bilan nom qozongan ÇELIKER GROUP kompaniyasi O‘zbekiston taraqqiyotiga faol sarmoya kiritib kelmoqda. Kompaniya asoschisi Emrah Cheliker mamlakatimizda biznes faoliyatining yo‘lga qo‘yilishi, qurilish sohasidagi innovatsiyalarning ahamiyati, sifatli uy-joy va infratuzilmaning o‘rni hamda keng ko‘lamli investitsiyalar O‘zbekiston uchun ochayotgan yangi istiqbollar haqida o‘z mulohazalari bilan o‘rtoqlashadi.
Nima uchun aynan O‘zbekiston?
ÇELIKER GROUP — 2010-yilda Turkiyada tashkil etilgan kompaniya. Tojikistonda bir qancha yirik loyihalarni muvaffaqiyatli yakunlagach, 2017-yilda Prezident Shavkat Mirziyoyev tomonidan ilgari surilgan mamlakatning yangi missiyasiga hissa qo‘shish maqsadida O‘zbekistonga sarmoya kiritishga qaror qildik.
Kompaniya missiyasini nimada ko‘rasiz?
Biz uchun odamlarni hayotdan zavqlanib yashaydigan shinam va xavfsiz uy-joy bilan ta’minlash ustuvor vazifadir. ÇELIKER GROUP’ning asosiy maqsadi — keng ko‘lamli rekonstruksiya ishlaridan so‘ng mijozlarga ishonchli, mukammal loyihalashtirilgan turar joylar va infratuzilmaviy yechimlarni taklif etishdan iborat. Doimiy rivojlanish tamoyillariga tayangan holda, biz mijozlar manfaatlarini himoya qiluvchi, mustahkam korporativ tuzilmaga ega nufuzli tijorat tashkilotini yaratishga intilamiz.
Mamlakatning shiddatli taraqqiyotiga qanday munosabatdasiz?
O‘zbekiston uzoq vaqt davomida investitsiyalardan biroz chetda qolgan edi, hozir esa innovatsion rivojlanish borasida ulkan marralarni zabt etmoqda. Ushbu yangi davrda tezkor va samarali choralar ko‘rish talab etilardi. Mamlakat bu vazifani muvaffaqiyatli uddaladi: infratuzilma va me’moriy ob’ektlar yangilanib, modernizatsiya qilindi, bu esa mahalliy hamda xalqaro investorlar e’tiborini tortdi.
Eng noyob loyihangiz haqida so‘zlab bersangiz.
Hozircha barcha tafsilotlarni ochiqlay olmayman, biroq yaqin orada O‘zbekistonning milliy qadriyatlarini aks ettiruvchi va yuqori darajadagi qulaylikni taqdim etadigan yangi loyihamizni namoyish etamiz. Bu ob’ekt mamlakatning ramziy binolaridan biriga aylanadi. Biz O‘zbekistonda ilgari qo‘llanilmagan mutlaqo yangi konsepsiyalar ustida ish olib boryapmiz.
Xorijdagi ilk qurilish loyihangiz haqida gapirib bering. Qanday qiyinchiliklarga duch kelgansiz?
Turkiyada tizim to‘liq shakllangan edi, shuning uchun u yerda jiddiy muammolarga duch kelmaganmiz. Ammo chet eldagi ilk loyihamiz davomida o‘z hududini yaxshi biladigan va bizning ish tizimimizga tez moslasha oladigan hamkasblar zarurligini angladik. O‘shandan buyon turli ishlarni bajarish uchun mahalliy mutaxassislarni o‘qitib kelmoqdamiz. Inson kapitaliga sarmoya kiritish — bizning faoliyatimizdagi eng muhim jihatlardan biridir.
Quruvchi va developper qanday fazilatlarga ega bo‘lishi kerak? Ular o‘rtasida farq bormi?
Pudratchi tajriba va innovatsion yondashuvni qo‘llagan holda, loyihani minimal xarajatlar bilan sifatli yakunlashi lozim. Qurilish sohasida zamonaviy me’morchilikni an’analar bilan uyg‘unlashtirib, odamlarning ortib borayotgan qulaylik ehtiyojlariga javob beradigan binolarni taklif etish zarur. Shuningdek, loyihalarni yanada jozibador qiladigan moliyaviy mexanizmlarni yaratish ham katta ahamiyatga ega.
Sarmoya kiritish uchun nimani tanlagan bo‘lardingiz: fond bozori, ko‘chmas mulkmi yoki ta’lim? Nima uchun?
Ta’lim hamisha birinchi o‘rinda turadi, biroq vaqtni to‘g‘ri tanlash va turli investitsiya vositalaridan unumli foydalanish ham muhim. Faqat bitta soha bilan cheklanish — hamisha xatarlidir. Sarmoya kiritishning oltin qoidasi: haqiqatda zarur bo‘lganidan ortiq mablag‘ sarflamaslik kerak, aks holda investitsiya kutilgan natijani bermasligi mumkin.
Toshkent turizm va sog‘liqni saqlash yo‘nalishlarida jadal rivojlanmoqda. Bu sohalardagi so‘nggi loyihalaringiz haqida to‘xtalsangiz.
Joriy yilda biz zamonaviy jarrohlik va tug‘ruq majmualariga ega, 218 o‘rinli Sino-Med shifoxonasini foydalanishga topshiramiz. Shuningdek, Double Tree by Hilton va Aloft by Marriott mehmonxonalari ustida ishni davom ettiryapmiz, har ikki loyihani 2025-yil yakuniga qadar bitkazishni rejalashtirganmiz. Ba’zi sho‘ba korxonalarimiz Hilton va InterContinental mehmonxonalari loyihalarida ham muvaffaqiyatli ishtirok etmoqda.
Toshkentdagi yangi zamonaviy shifoxona haqida gapiring. U jahon brendi ostida ochiladimi? Boshqa klinikalardan nimasi bilan ajralib turadi?
Ushbu loyiha xususiy investor tashabbusi bo‘lib, unda Sog‘liqni saqlash vazirligi hamkor sifatida ishtirok etmayapti. Binoning umumiy maydoni 22 500 kvadrat metrni tashkil etib, unda 11 ta operatsiya xonasi va intensiv terapiya bo‘limlari mavjud bo‘ladi. Shifoxona 178 nafar bemorni qabul qila oladi, shuningdek, bemorga hamrohlik qiluvchilar uchun hojatxona va dushga ega alohida xonalar ko‘zda tutilgan
Faqat bitta shahar yoki mamlakatda ishlaydigan quruvchi bir xil qurilishlarga duch kelishi mumkinligi haqida nima deysiz?
Kompaniyamiz tashkil etilganidan buyon uchta qit’ada va to‘rtta davlatda faoliyat yuritib kelmoqdamiz, bu esa bizga kengroq dunyoqarash va tajriba beradi. Hozirda asosiy e’tiborimiz O‘zbekistonga qaratilgan bo‘lsa-da, Turkiya, Tojikiston va Ganadagi loyihalarimizni ham davom ettiryapmiz. Faqat bitta hudud bilan cheklanish ba’zan yangi va kreativ g‘oyalardan mahrum bo‘lishga olib kelishi mumkin.
Toshkentda boshlangan renovatsiya jarayoniga munosabatingiz qanday? Ushbu yo‘nalishda ishtirok etish rejalaringiz bormi?
Biz Toshkentning yangi tumanlaridagi istiqbolli loyihalarni diqqat bilan kuzatib boryapmiz. Bu amaldagi shahar markazini yaxshilash uchun juda xayrli tashabbus bo‘lib, markazning o‘zidagi loyihalar shaharning qiyofasini butunlay o‘zgartirishi mumkin. Infratuzilmani yangilash — odamlarning bugungi ehtiyojlarini qondirish yo‘lidagi muhim qadamdir.
Quruvchilar va developperlar dunyoni o‘zgartiradi deb hisoblaysizmi?
Bu murakkab savol. Biroq qurilish — bu insonlar uchun xavfsizroq va shinamroq hayot sharoitlarini yaratishning asosiy vositasi ekanini ishonch bilan aytish mumkin.
Agar loyiha brendingiz falsafasiga zid bo‘lsa, undan voz kechasizmi?
Bizning eng asosiy shartimiz — sifat va huquqiy majburiyatlarga qat’iy rioya qilishdir. Bu jihatlar biz uchun o‘zgarmas mezon — "qat’iy chegara" hisoblanadi. Biz ushbu tamoyillarga zid keladigan loyihalarda ishtirok etmaymiz.
Katta mablag‘ bo‘lsa ham, bir kechada developperlik yoki qurilish kompaniyasini ochib bo‘lmaydi. Yana nimalarga ega bo‘lish kerak?
Boy tajriba va ahil jamoa zarur. Har bir mayda tafsilotni ham sinchiklab tekshirish kerak, aks holda ish nazoratdan chiqib ketishi mumkin. Kelajakda muammolarga duch kelmaslik uchun tannarx va talab o‘rtasidagi muvozanatni to‘g‘ri yo‘lga qo‘yish lozim.
Hozirda ko‘chmas mulk bozorida qanday yangi texnologiyalar qo‘llanilmoqda? Sizning kompaniyangiz ulardan foydalanadimi?
Biz aqlli va ekologik toza texnologiyalarni qo‘llashga intilamiz. Masalan, Nur loyihasida "yashil bino" sertifikatini olamiz: unda atrof-muhit ifloslanishi minimallashtirilgan va maksimal qulaylik ta’minlangan. Avtomatlashtirilgan tizimlar ham shinamlik yaratishda muhim rol o‘ynaydi.
"Taqiqlanmagan har bir narsaga ruxsat berilgan" degan iboraga qanday qaraysiz?
Qonuniy bo‘lgan hamma narsa ham hamisha to‘g‘ri bo‘lavermaydi. Bizning ustuvor vazifamiz — ham investor, ham yakuniy iste’molchi huquqlarini hurmat qilgan holda, jamiyat uchun maksimal foyda keltirishdir.
O‘zbekiston ishonchini qanday qozongansiz? Mustahkam hamkorlikni qanday qurish mumkin?
Toshkentdagi nufuzli loyihalarda ishtirok etayotganimiz kompaniyamizga bo‘lgan ishonchning yorqin namunasidir. Bu ishonchni saqlab qolish uchun e’lon qilingan qadriyatlardan va sifat standartlaridan aslo chekinmaslik lozim.
Toshkentda qachondan beri faoliyat yurityapsiz?
2017-yildan buyon Toshkent va Turkiya o‘rtasida doimiy qatnayman, lekin vaqtimning asosiy qismini shu yerda o‘tkazaman.
O‘zbekistonning nimalari sizga ko‘proq yoqadi?
O‘zimni bu yerda o‘z uyimdagidek his qilaman: madaniyatimiz o‘xshash, odamlar samimiy va hurmatli, mahalliy taomlar esa ta’rifga til ojiz darajada mazali.
Oila professional yutuqlaringizga qanday ta’sir ko‘rsatgan?
Yaqinlarimning ma’naviy daldasi men uchun hamisha kuch-quvvat manbai bo‘lgan. Men ish va oilani bir-biridan ajratishga, muvozanatni saqlashga harakat qilaman.
Bo‘sh vaqtingizni qanday o‘tkazasiz?
Kompaniyamiz shiori shunday: bir loyihani yakunlab, darhol keyingisini boshlash. Ko‘proq bo‘sh vaqtim bo‘lishini xohlardim, lekin odatda undan shaxsiy rivojlanishim uchun foydalanaman.
Karyerada muvaffaqiyatga intilayotgan yosh oilalarga nimalarni maslahat berasiz?
Mustaqil hayotni erta boshlash, pul topish va uni oqilona sarflashni o‘rganish, shuningdek, sarmoya kiritish juda muhim. Biznesda hammasi silliq ketayotgan bo‘lsa ham, bu barqarorlikka to‘liq kafolat bermaydi. Oilada esa o‘zaro hurmat va ishonch eng asosiy qadriyat bo‘lishi lozim.
"Oila boshlig‘i" tushunchasini siz qanday izohlaysiz?
Bu — oilani himoya qiladigan, uni har tomonlama rivojlantiradigan va oila a’zolarining farovonligini ta’minlaydigan insondir.
Yaxshi kayfiyatni tiklashning siz uchun eng samarali usuli qaysi?
Men uchun bu — ibodat qilish va yaqinlarimga xizmat qilishdir. Albatta, har bir insonning o‘ziga xos usullari bo‘lishi mumkin.
