Sigara, steyk va vino shaydolari uchun yangi an’ana: Toshkentda Steak & Cigar Nights oqshomlari
Mixaylova
Foto: Anton Kim
Miratorg Signature restorani ayvonida o‘tgan to‘rt oqshom barcha ishtirokchilarda unutilmas taassurot qoldirdi. Iyuldan sentyabrgacha bu yerda afisionadolar uchun maxsus tashkil etilgan "Steak & Cigar Nights" yopiq tadbirlar turkumi bo‘lib o‘tdi. Nafis sigaralar, premium darajadagi steyklar va yillangan ispan vinosi hamrohligida o‘tgan ushbu eksklyuziv kechalarda 60 nafar mehmon ishtirok etdi.
Har bir oqshom tashrif buyuruvchilarga taqdim etilgan maxsus qadah va La Casa Del Habano’dan 20 yillik vintaj sigara bilan boshlanib, tadbirning yuqori saviyasini belgilab berdi. Shundan so‘ng mehmonlar Miratorg brendining gastronomik nafisliklar olamiga taklif etildilar. Miratorg Signature bosh oshpazi tomonidan o‘tkazilgan mahorat darsida go‘shtning turli navlarini tayyorlash usullari va mukammal steyk yaratish sirlari haqida so‘zlab berildi.
Mahorat darsidan so‘ng asosiy e’tibor go‘shtli taomlarga qaratilgan kechki ovqatga navbat berildi. Dasturxondan sifatli mol go‘shtining barcha jozibasini ochib beruvchi turli xil taomlar joy oldi: karpachcho, sakkiz xil steyk hamda Altash/Pernod Ricard taqdim etgan Campo Vieja Gran Reserva ispan vinosi bilan birga tortilgan, ikki oy davomida maxsus saqlangan Dry Age hashamatli go‘sht. Go‘shtning to‘yingan ta’mi, sharobning o‘tkir ifori hamda umumiy dasturxon atrofida sevimli mashg‘ulotlar, sayohat va kasbiy faoliyat haqidagi samimiy suhbatlar — oqshomdan haqiqiy zavq olishning eng tabiiy usuliga aylandi.
Har bir kechki ovqatning o‘ziga xos yakuni La Casa Del Habano sigaralarining o‘tkir va boy ifori bilan bezaldi. Mehmonlarga o‘z tarixi va xarakteriga ega bo‘lgan ikkita sigara taklif etildi — ularning ta’mini shoshilmasdan his qilish va boshqa bilimdonlar bilan muhokama qilish uchun barcha sharoitlar yaratildi.
Miratorg va La Casa Del Habano mehmonlar uchun mukammal gastronomik ittifoqni taqdim etgan bo‘lsa, Porsche kompaniyasi oqshomga o‘zgacha drayv bag‘ishladi. Ishtirokchilarga kompaniyaning zamonaviy modellari haqida ma’lumot berilib, Cigar Academy Uz yopiq klubi a’zolari Olmatidagi "Porsche Experience" poyga trassasiga taklif etildi. HILL UZBEKISTAN jurnali esa axborot hamkori sifatida tadbirning intellektual muhitini yanada boyitdi. Shu tariqa, "Steak & Cigar Nights" oqshomlari Toshkentda nafis hordiq va sifatli muloqotni qadrlaydiganlar uchun yangi bir go‘zal an’anaga aylandi.
Ushbu maqola tamaki yoki alkogol mahsulotlarini reklama qilish yoki targ‘ib etish maqsadini ko‘zlamaydi. HILL UZBEKISTAN jurnali chekish va spirtli ichimliklar iste’mol qilishning salomatlikka zararli ekanini eslatib o‘tadi.
